Tetun: VISE-MINISTRA MSSI PARTISIPA DIÁLOGU KOMUNITÁRIA IHA POSTU ADMINISTRATIVU FATUMEA

Vise-Ministra MSSI, Signi Verdial partisipa diálogu komunitária iha ámbitu programa Governu iha povu nia le’et “NAROMAN BA SUKU”. Atividade Diálogu ne’e organiza husi Ministériu ba Asuntus Parlamentares no Komunikasaun Sosiál-MAPKOMS ne’ebé hala’o iha Munisípiu Cova Lima, Postu Administrativu Fatumea, Suku Belulik Leten, Loron Sábadu (30/07/2022). Objetivu husi diálogu refere mak, hato’o programa VIII Governu Konstitusionál ba komunidade no rona povu ninia hanoin, liu-liu rona preoukupasoens ne’ebé komunidade Postu Administrativu Fatumea enfrenta. Iha diálogu, komunidade hato’o sira nia preoukupasoens, liu-liu liga ba Edukasaun, Agrikultura, Estrada, Eletrisidade, Bee moos inklui problema sosiais sira seluk. Iha biban ne’e, Ministru ba Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo hateten, programa diálogu ida ne’e atu rona direta komunidade sira nia hanoin no hakarak liga ba prosesu dezenvolvimentu, liu-liu rona komunidade sira ninia preokupasoens no problemas ne’ebé sira enfrenta nune’e governu bele buka ninia solusaun. “Prioridade ba VIII Governu Konstitusionál mak ema, tanba EMA MAK SAI HANESAN SENTRU BA DEZENVOLVIMENTU. Programa Governu tenki investe ba ema iha aspetu hotu-hotu (Edukasaun, Saúde, Infra-estrutura, Sosiál, nsst), fó atensaun ba ema iha loron ida ita sei sai husi ki’ak no mukit”. Iha tempu badak, Governu liu husi MAPKOMS sei kria “SENTRU INFORMASAUN BA KOMUNIDADE”, liu-liu ba komunidade Belulik Leten, esplika Ministru ba Asuntus Parlamentares no Komunikasaun Sosiál (MAPKOMS). Iha diálogu komunitária ne’e, komunidade balun ne’ebé ho idade 60 ba leten hato’o sira nia preoukupasoens liga ho subsídiu Idosos & Inválides, tanba durante ne’e sira submete ona sira nia dokumentus maibé ikus mai sira nia naran nafatin la sai iha lista pagamentu hodi hetan sira ninia direitu. Hatan ba preokupasaun hirak ne’e, Vise-Ministra MSSI, Signi Verdial hateten, “ba Idosos sira ne’ebé hatama ona dokumentu maibé naran seidauk sai iha lista, ami sei lori ninia kartaun eleitorál rasik hodi bele konfirma iha sistema baze dadus iha nasionál hodi fó nia solusaun”. Iha okaziaun ne’e mós, Vise-Ministra MSSI, Signi Verdial esplika programa foun MSSI nian ne’ebé hanaran programa Bolsa da Mãe-Jerasaun Foun (BDM-JF), programa ida ne’e ninia objetivu mak atu investe ba inan isin rua no labarik sira (idade 0-3 no kontinua to’o idade 6), liu-liu atu rezolve problema mál nutrisaun no ra’es badak. Governu tenke investe ba labarik sira hahu husi inan ninia kanotak. Ho programa BDM-JF ne’e inan isin rua sei simu $.15,00 kada fulan no labarik sira sei simu $.20,00 kada fulan, karik labarik moris ho defisiénsia sei simu $.30,00 kada fulan. Iha fatin hanesan, Xefe Suku Belulik Leten, Quintino de Amaral hateten, “ami komunidade Postu Administrativu Fatumea, liu-liu Suku Belulik Leten, sente kontente no apresia ho programa diálogu komunitária ida ne’e, tanba liu husi diálogu ami bele hato’o ami nia preoukupasoens no difikuldades ba VIII Governu Konstitusionál, nune’e ba futuru Governu bele fó ninia solusaun ruma ba problema hirak ne’ebé ami enfrenta iha baze”.

Partisipa iha diálogu ne’e mak hanesan, Ministru Edukasaun Juventude no Desportu (MEJD), Armindo Maia, Presidente INDDICA.IP, Representante Ministériu Saúde, Representante Administradór Munisípiu Cova-Lima, Administradór Postu Administrativu Fatumea, Xefes do Suku no Xefe Aldeias, Sosiedade Sívil, Estudantes inklui komunidade sira iha fatin refere.